ភ្នំពេញ៖ ចៅស្រីរបស់នាយករដ្ឋមន្ត្រីកម្ពុជា ដែលទើបបញ្ចប់ការសិក្សាពីបរទេសបានលេចមុខក្នុងសកម្មភាពមនុស្សធម៌នៅកម្ពុជា និងត្រូវបានសម្ដេចតេជោចាត់ទុកថាជាការងារដែលបន្តពីជីដូនគឺសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

នាយករដ្ឋមន្ត្រី សម្ដេចតេជោ ហ៊ុន សែន បានសរសេរនៅលើបណ្ដាញសង្គមតេឡេក្រាមរបស់សម្ដេចនៅព្រឹកថ្ងៃទី១១ ខែធ្នូ ឆ្នាំ២០២២នេះ ដោយអមជាមួយរូបភាពចៅស្រី និងលោកស្រី ហ៊ុន ម៉ាណា ក្នុងពេលចុះការងារមនុស្សធម៌មួយថា៖ «កូននិងចៅបន្តសកម្មភាពមនុស្សធម៌បន្តពីម្តាយនិងជីដូន»។

ចៅស្រីទី១ របស់នាយករដ្ឋមន្ត្រី សម្ដេចតេជោ ហ៊ុន សែន បានត្រលប់មកកាន់ប្រទេសកម្ពុជាវិញនៅថ្ងៃទី៨ ខែកញ្ញា ឆ្នាំ២០២២ បន្ទាប់ពីប្រឡងបញ្ចប់ការសិក្សានៅប្រទេសបារាំង។ ចៅស្រីម្នាក់នេះហើយដែលត្រូវបានសម្ដេចតេជោ អនុញ្ញាតឱ្យដើរតាមសំដែងការគួរសមជាប្រធានាធិបតី និងប្រធានសភាហុងគ្រីក្នុងឆ្នាំ២០១៩ និងនាំទៅចូលរួមកិច្ចប្រជុំអង្គការសហប្រជាជាតិ និងចូលរួមដំណើរទស្សនកិច្ចជាមួយសម្ដេចតេជោនៅលើឆាកអន្តរជាតិនៅឆ្នាំ២០២២នេះផងដែរ៕